ദോഹ: ഖത്തർ ദേശീയ കായിക ദിനത്തിന്റെ (National Sports Day) വിജയകരമായ മാതൃക പിന്തുടർന്ന് രാജ്യത്ത് ഔദ്യോഗിക അവധിയോടുകൂടി 'ദേശീയ വായനാ-സാംസ്‌കാരിക ദിനം' (National Day for Reading and Culture) നടപ്പിലാക്കണമെന്ന ആവശ്യവുമായി പ്രമുഖ എഴുത്തുകാരിയും കൺസൾട്ടന്റുമായ മൗദി അൽ ഹജ്രി. സമൂഹത്തിൽ സജീവമായ പങ്കാളിത്തവും വികസന പരിഷ്‌കാരങ്ങളും ലക്ഷ്യമിട്ട് അവർ പുറത്തിറക്കിയ 'നാഷണൽ പ്രൊപ്പോസൽസ്' (National Proposals) എന്ന പുതിയ പുസ്തകത്തിന്റെ പ്രകാശനത്തോടനുബന്ധിച്ച് പ്രാദേശിക പത്രത്തിനു നൽകിയ പ്രത്യേക അഭിമുഖത്തിലാണ് അവർ ഈ ആശയം പങ്കുവെച്ചത്.
കായിക ദിനം ശാരീരികക്ഷമത ഉറപ്പാക്കുമ്പോൾ, വായനാദിനം മനുഷ്യന്റെ മസ്തിഷ്‌കത്തിനായുള്ള കായിക വിനോദമായി മാറുമെന്ന് അൽ ഹജ്രി അഭിപ്രായപ്പെട്ടു. ആരോഗ്യമുള്ള ശരീരത്തിലേ ആരോഗ്യകരമായ മനസ്സ് ഉണ്ടാകഎന്ന പഴഞ്ചൊല്ല് ഓർമ്മിപ്പിച്ചുകൊണ്ട് ചിന്തയും സർഗ്ഗാത്മകതയും വളർത്താൻ വായന അനിവാര്യമാണെന്ന് അവർ ചൂണ്ടിക്കാട്ടി. കുട്ടികൾ മുതൽ മുതിർന്നവർ വരെ എല്ലാ പ്രായക്കാരിലും ഡിജിറ്റൽ-സാമൂഹിക മാധ്യമ പ്ലാറ്റ്‌ഫോമുകൾ വഴിയും പരമ്പരാഗത പുസ്തകങ്ങൾ വഴിയും വായനാശീലം വളർത്തുകയാണ് ഇതിന്റെ ലക്ഷ്യം.
സ്‌കൂളുകൾ, പൊതു-സ്വകാര്യ സ്ഥാപനങ്ങൾ എന്നിവയുടെ സഹകരണത്തോടെ പുസ്തകമേളകൾ, സാംസ്‌കാരിക ഉത്സവങ്ങൾ, വിദ്യാഭ്യാസ ശിൽപ്പശാലകൾ എന്നിവ ഈ ദിനത്തിന്റെ ഭാഗമായി സംഘടിപ്പിക്കാൻ സാധിക്കും. അറിവിലൂടെയും വായനയിലൂടെയും ഭാവി കെട്ടിപ്പടുക്കാൻ ഖത്തറിനെ ഈ പദ്ധതി കൂടുതൽ സഹായിക്കുമെന്നും അവർ കൂട്ടിച്ചേർത്തു.
